Akitania Berria-Euskadi-Nafarroa Euroeskualdeko ikus-entzunezko lantaldeak, ABEN osatzen duten gobernuek, ALCAk eta Zineuskadik osatua, Euroeskualdeko Ikus-entzunezkoen Sariaren laugarren edizioa abiarazi du. Berriz ere, iazko edizioan bezala, aurtengo ardatza ikus-entzunezko animazioa izango da.
Aurreko edizioetan bezala, 6.000 euro jasoko ditu sari irabazleak. Eskatzaileek, mugaz gaindiko erkidego horietako hiru lurraldeetako batean kokatuta daudenek, online aurkeztu ahal izango dituzte hautagaitzak urtarrilaren 12ra arte. Metrajearen % 80k gutxienez animazioa duten miniserieak, telesailak, film laburrak edo film luzeak aurkeztu ahal izango dira
Proiektuak idazteko, garatzeko edo aurreproduzitzeko fasean egon beharko dira. Kanpoan geratuko dira dagoeneko ekoizpen-jarduerak hasi dituztenak. Hautagarritasunerako aldez aurreko baldintza ez bada ere, gomendatzen da proiektuek finantzaketa-konpromisoa izatea edo ekoizpen-aurrekontu osoaren % 10, gutxienez, aseguratua izatea.
Saria bi fasetan antolatuko da. Profesionalen epaimahai batek egindako aurre-hautaketa baten ondoren, hautatutako 3-6 proiektuek beren pieza defendatzeko aukera izango dute martxoaren 5ean Cartoon Movie izeneko animaziozko film luzeen koprodukziorako europar foroaren esparruan egingo den pitching saio batean. Foro hori 2024ko martxoaren 5etik 7ra bitartean egingo da, Bordelen (Frantzia).
Epaimahaiak kalitate artistikoa eta edukiaren berezitasuna (40 puntu), garapenaren eta aurrekontuaren egoera (40 puntu) eta Euroeskualdearen sustapena (20 puntu) ebaluatuko ditu.
Sariari buruz
2021ean hasita, Euroeskualdeko Ikus-entzunezkoen Sariak Akitania-Euskadi-Nafarroa Euroeskualdearen ikus-entzunezkoen sektorea sustatzea du helburu, lurraldeko industria, talentua, kokalekuak, hizkuntza, historia eta gainerako aberastasunak balorizatuz.
2023ko edizioa ikus-entzunezko animazioaren sorkuntza saritzera bideratutako lehena izan zen. Oraingoan, “El cuerpo de Cristo” lana saritu zuten, Beatriz Lemaren zuzendaritzapean eta Unikok ekoiztuta. Saria Next Lab Finance & Tech Navarra festibalaren bigarren edizioan banatu zen, eta Bea Lemak idatzi eta ekoitzitako izen bereko komiki bat egokitzeko proiektu bat bereizi zen. Lanak Adelaren istorioa kontatzen du. Emakume horrek gaixotasun mentala du, eta ez da ulertuta sentitzen, ez familiagatik, ez komunitate medikoagatik. Izan ere, medikazioa erabateko sendabidea bezala aurkezten diote. Aurreko edizioetan, Itiar Minguez eta Pedro Fuentesen “Entre muros” eta Isis Letterierren “Saisons d ‘oiseaux” lanak saritu ziren.
Aurretik, Euroeskualdeko ikus-entzunezko lantaldeak egindako lanari esker, “Euroeskualdeko koprodukzio-gida” egin ahal izan da. Gida horrek mugaz gaindiko koprodukziora jo nahi duten eragilentzat beharrezkoa den informazioa biltzen du (Euroeskualdeko kide diren gobernuen lehentasun nagusiak, zerga-pizgarrien politikak, laguntza-eremuak, funtsak, sektoreko elkarteen, film commissionsen, erakundeetako arduradunen, jaialdi nagusien eta abarren kontaktuak).
Mila 
Bienvenue 
Mil