Mugikortasun ziurtatzailea POCTEFA FORMA NAEN proiektuko ikasleentzat

Iruñeko DONAPEA eta Baionako Chambres de Métiers et de   l’Artisanat 64 prestakuntza-zentroetako ikasleek mugikortasun ziurtatzailea egin dute POCTEFA « FORMA NAEN» Europako proiektuko partaide gisa.

• 2022ko urtarrilaren 17an, bi asteko mugikortasuna hasi zen bi zentroen artean, konpetentzia-bloke bat ikasi eta ziurtatzeko helburuarekin.

• Horrela, Nafarroako ikasleak bi astez izan dira Baionako zentroan klaseetan, eta gainazalak berdindu eta prestatzeko blokearen baliokidea egin dute autoen pintore ziurtagiriaren barruan.

Nafarroako 5 ikaslek eta Akitaniako 5 ikaslek parte hartu dute mugikortasun ziurtatzailean. FORMA NAEN proiektuaren barruan programatutako jarduera da, POCTEFA Programak kofinantzatuta. Horrela, DONAPEA zentroko ikasleak klasera joan dira Baionako Chambre de Métiers et de l ‘Artisanat ikastetxean, eta gainazalak berdindu eta prestatzeko heziketa-zikloko konpetentzia-blokearen baliokidea ikasi dute. Era berean, Baionako 5 ikasle DONAPEAren ikastetxera joan dira.

Ikasleek gaitasuneko eta mugikortasun ziurtatuko esperientzia pilotu batean parte hartu dute, Lanbide Heziketako tituluen eta gaitasunen baliokidetasunerantz eta baliozkotzerantz aurrera egiteko helburuarekin.

Mugikortasuna bi ikastetxeen arteko erdibidean antolatutako jardunaldi batekin amaitu da. Bertan, ikasleek, irakasle parte-hartzaileek eta ziurtatzaileek jardunbide egokiak trukatu, trukearen garapena aztertu, irakaskuntza-metodoak alderatu eta mugikortasun-esperientzia balioetsi ahal izan dute.

Forma NAEN proiektua Akitania Berriko, Euskadiko eta Nafarroako eskualdeen artean abian jarritako ekimen berri bat da, 2020-2022 biurtekorako lanbide-heziketaren arloko prestakuntza-eskaintza kualifikatu eta espezifikoa garatu nahi duena, mugaz gaindiko egoerara egokitua eta gazteei benetako enplegu-aukerak eskaintzeko gaitasuna duena. Proiektu honen xedea da azterlanak eta analisiak egitea – Tituluak baliozkotzeko, gaitasunak parekatzeko eta abar – Eta prestakuntza-modulu praktikoak egitea.

Akitania Berria Euskadi Nafarroa Euroeskualdea, Chambre des Métiers et de l’Artisanat des Pyrénées Atlantiques, Nafarroako Gobernuko Hezkuntza Saila, ZubiGune Fundazioa, CIFP Usurbil LHII, Ikaslan Gipuzkoa, TKNIKA eta Chambre Régionale de Métiers et de l’Artisanat de Nouvelle-Aquitaine erakundeek osaturiko partzuergoak bideratzen du proiektua. Horiez gain, Lycée des métiers Paul Bert, LGT Saint Dominique, Lycée Louis de Foix, Plaiaundi, Don Bosco, CIP Elizondo Lanbide Eskola IIP, CIP Donapea, CI Virgen del Camino IVAC eta l’ANFA erakundea ere proiektuko partaide dira.

Forma NAEN izeneko proiektu hau – « Euroeskualdeko lan merkatuan lanbideratzeko mugaz gaindiko formazioaren garapena » – INTERREG POCTEFA (DG REGIO) deialdiak hautatu eta diruz lagunduriko europar proiektua da, proiektuaren %65 europar funtsek finantzatzen dute eta 746.875,68 euroko aurrekontua du, zergak barne. POCTEFA proiektuak Espainia-Frantzia-Andorra inguruko integrazio ekonomikoa eta gizarteratzea indartzea ditu helburu. Mugaz gaindiko ekonomia, gizartea eta ingurumenari zuzenduriko ekintzak babesten ditu, lurraldearen garapen jasangarria sustatzeko estrategia komunen bidez.