Ciutadanetat euroregionala

L’identitat comuna, çò que nos apròcha, es la coneissença e la reconeissença de las nòstras diferéncias e de las nòstras similitudas. La construccion de la ciutadanetat euroregionala es al còr de la nòstra estrategia.

L’Euroregion trabalha sus 4 linhas d’accion :

Lo plurilingüisme

La lenga constituís un dels principals obstacles a la coesion e a la construccion d’una ciutadanetat euroregionala. L’Euroregion, territòri ont coabitan 4 lengas diferentas (basco, castilhan, francés e occitan) encoratja lor coneissença mutuala. L’usatge e l’aprendissatge de las lengas de l’Euroregion son desfísses transversals que trabalham a travèrs diferents espleches.

Dins l’encastre del plurilingüisme, l’Euroregion a desvolopat, en aliança amb l’Ofici public de la lenga basca, un dispositiu finançat pel POCTEFA tendent a formar des ensenhaires d’escòla primària bilingüe francés-basco (Eskola Futura).

La cultura

L’accion culturala de l’Euroregion es menada jos la forma de projèctes, alianças estrategicas e importants mejans en animacion. Entend respondre a las atentas dels actors de l’espaci euroregional. L’actualizacion del Plan Estrategic de l’Euroregion 2014-2020 a afirmat la prioritat del desvolopament de la cultura e de la mobilitat culturala al sen de l’Euroregion.

La nòstra volontat d’afortir la cultura dins l’espaci transfronterèr se fa tanben via alianças estrategicas coma Aquitaine.eus : per la mobilitat e la difusion dels creators culturals bascos e la creacion de relacions artisticas transfronterèras al sen de l’Euroregion, e Zubiak : emission de ràdio transfronterèra.

La joventut

Los joves son lo present e l’avenidor de la ciutadanetat euroregionala. La mobilitat e los escambis entre joves demòran subjèctes essencials del trabalh de l’Euroregion.

La « borsa euroregionala » es estada mesa en plaça per encoratjar la mobilitat universitària al sen del territòri.

L’espòrt

La practica esportiva transfronterèra e euroregionala es desvolopada dins diferents domenis. Una aliança estrategica sul rugbí transfronterèr permetrà la realisacion d’un novèl encastre d’accion transfronterèr pel rugbí basco.

Aquelas 4 prioritats son desvolopadas a travèrs, entre d’autres, de la crida de projèctes « Ciutadanetat euroregionala ».