Leyre Azcona Sanz de Galdeanok Akitania-Berria Euskadi Nafarroa Euroeskualdearen zuzendaritza bere gain hartu du

2026ko martxoaz geroztik, Leyre Azcona Sanz de Galdeanok zuzentzen du Akitania-Berria Euskadi Nafarroa Euroeskualdea. 2018az geroztik erakundeko hainbat ardura bere gain hartu ondoren, etapa berri honi ekingo dio orain eta bere esperientzia guztia Euroeskualdearen garapenari eskainiko dio.

Legelaria da prestakuntzaz eta Europako Gaietako masterra du Sciences Po-ren eskutik. Ibilbide sendoa du Europako politiketan eta lurralde-lankidetzan. Bruselan Europako zenbait erakundetan jardun zuen eta Euroeskualdeko kultura sakonki du errotuta; horri esker, bikain ezagutzen ditu mugaz gaindiko erronkak eta hiru lurraldeen arteko lankidetza-dinamikak.

Lurralde-lankidetzako arduradun gisa, Euroeskualdearen plan estrategikoaren bigarren ardatza zuzendu du, garapen adimendun, lehiakor, inklusibo eta jasangarriari buruzkoa, eta proiektu egituratzaileen hedapena koordinatu du hainbat arlotan, hala nola mugaz gaindiko enpleguan, garapen ekonomikoan, berrikuntzan, goi-mailako hezkuntzan eta unibertsitate-lankidetzan.

Bere izendapena Euroeskualdearentzako une erabakigarri batean iritsi da. Aldatzen ari den Europa baten testuinguruan, erakundeak garapen-fase berri bati ekingo dio, zenbait alderdi esanguratsurekin: programazio berriak abian jartzea, BRIDGEforEU eta antzeko europar ekimenak sortzea (mugaz gaindiko oztopoak identifikatzea eta ezabatzea errazteko) eta 2028rako hirugarren plan estrategikoa prestatzea. Akitania-Berriko, Euskadiko eta Nafarroako talde eta bazkide instituzionalekin batera, Leyre Azcona Sanz de Galdeanok Euroeskualdearen lehentasun estrategikoak martxan jartzen lagunduko du, eta arreta berezia jarriko die mugaz gaindiko lankidetza oraindik ere zailtzen dute oztopo administratibo, juridiko eta operatiboak identifikatzeari, horiei aurrea hartzeari eta ebazteari. Bere lana herritarren, enpresen eta eragile publikoen onurarako soluzio zehatzak garatzea izango da, batez ere mugikortasunaren, enpleguaren, hezkuntzaren, berrikuntzaren eta garapen ekonomikoaren arloetan. Horrez gain, Euroeskualdearen zeregina sendotuko du, Europa-mailako integraziorako eta lankidetza-modu berriak esperimentatzeko erreferentziazko lurralde gisa.