EMPLEO EGUNAK 2025: leihatila bakar batek 120 partaide laguntzen ditu haien mugaz gaindiko izapideekin

• Mugaz gaindiko informazio jardunaldiak – Empleo Egunak, azaroaren 17 eta 18an iragan ziren Euroeskualdean Hendaian. Mugaren bi alboetan bizi diren, lan egiten duten edo lan egin nahi duten pertsonentzako erantzun praktikoak eskaini zituzten toki bakar batean.
• Arreta 120 pertsona baino gehiagori eskainita, banako 270 elkarrizketa burututa eta 14 administrazioren parte hartzearekin, Empleo Egunak jardunaldiek arrakasta izugarriaren ostean egin dute itxiera.
• LANEAN – AFOMEF POCTEFA proiektu europarraren baitan antolatuak, jardunaldi hauek Euroeskualdeko biztanleen eta enpresa sarearen zerbitzura bideratutako mugaz gaindiko zerbitzu publikoa eraikitzeko dinamikan sartzen dira.

Akitania‑Berria Euskadi Nafarroa Euroeskualdeak (NAEN) antolatu zuen pasa diren azaroaren 17 eta 18an Hendaian Empleo Egunak izeneko mugaz gaindiko informazio jardunaldien hirugarren edizioa, mugaz gaindiko langile eta enpresentzako ezinbesteko bihurtu den topaketa. Ekitaldi paregabe honek mugaren bi alboetako erakunde eskudunak elkartu zituen mugaz gaindiko langileen eskubide eta betebeharrei buruzko informazio garrantzitsua zuzenean eskaini ahal izateko.

Jardunaldi hauen balantze oso baikorrak agerian uzten du mugaz gaindiko lurraldean biztanleentzako zerbitzura dagoen leihatila bakar baten izatearen garrantzia eta beharra.

«Empleo Egunak benetako mugaz gaindiko zerbitzu publikoa da: pertsona bakoitzak bere izapideekiko erantzunak lor ditzakeen eremua da, baina baita administrazioen arteko koordinazio‑gunea ere, erantzun bateratua eskaini ahal izateko. Erabiltzaileek topatutako zailtasuna administrazio eskuduna zein den eta zein dokumentu aurkeztu behar duten jakitea da, administrazioen konplexutasunean galdu gabe, alegia. Kontsulta ohikoenen artean, partaideen % 58a erretiroarekin erlazionatutako zalantzengatik bertaratu zen, eta % 38ak fiskalitateari buruzko galderak zeuzkan, jarraian gizarte segurantzari eta kotizazioei buruzko kontsultak doazelarik», nabarmentzen du Leyre Azconak, Euroeskualdeko bitartekako zuzendariak.

MUGAZ GAINDIKO ZERBITZU PUBLIKOA

Bi egunetan zehar, Euroeskualdeko lurraldeko biztanleak zuzenean administrazio nagusietako ordezkariekin bildu ahal izan ziren: URSSAF, DGFIP, SEPE, France Travail, LANBIDE, Nafarroako Enplegu Zerbitzua, INSS, TGSS, CARSAT, CPAM, CAF, Gipuzkoako Foru Aldundia, Nafarroako Foru Ogasuna, DDETS eta DREETS.

«Hainbat izapide neuzkan administrazio ezberdinekin eta dena modu koordinatuago batean izateko aukera ezin hobea dirudit. Hemen modu askean egin ditzakegu gai askori buruzko galderak. Asko lagundu didate: luzaroan zain egondako dokumentu bat lortzeko prozesua bizkortu zuten eta benetan eskertzekoa izan da. Mugaz gaindiko langile batentzako erronka nagusia erakunde publiko ezberdinen arteko koordinazioa da, bakoitza bere epemugekin, eta batzuetan oso konplexu bihurtzen da dena. Euroeskualdearen ekimen hau zoragarria dirudit, izan ere mugaren bi alboetako erakundeak prozedurak bizkortzen saiatzen ari direla ikusteko modu bat da, guri erabilera sinpleago bat eskaintzeko», ospatzen du bere egoerari buruzko informazioa jasotzeko bertaratutako Akitania‑Berriko langile batek.

MUGAREN BI ALDEETAKO ADMINISTRAZIOEN ARTEKO KOORDINAZIOA

Mugaz gaindiko langileen eta lurraldeko enpresen zerbitzura dauden jardunaldi hauek bertako administrazioetako eragileen arteko koordinaziorako eremu dira ere. Empleo Egunek homologoekin partekatzeko tokia eskaintzen die, informazioa eguneratzeko eta erakunde bakoitzaren funtzionamendua hobeto ulertzeko.

«Gure ustez oso interesgarria da hiru enplegu‑zerbitzu publikoak biltzea, horrek gure mugaz gaindiko biztanleei zerbitzu hobeagoa eskaintzen lagun gaitzake. Gu partaide garen LANEAN proiektuan sinesten dugu, horren helburua mugaz gaindiko langileek orain arte topatutako zailtasunak ezabatzea baita. Denontzat garrantzitsua da ere gizarte segurantzako eta ogasuneko araubide ezberdinen funtzionamendua hobeto ulertzea, mugako sentsazio hori murrizteko, elkarrekin lan egin ahal izateko eta gure arteko kolaborazioa indartzeko», adierazten du administrazio partaideetako batek.

EPE LUZEKO KONPROMISOA AFOMEF POCTEFA LANEAN PROIEKTU EUROPARRAREKIN

Empleo Egunak jardunaldiak LANEAN proiektu europarraren barne dira, Eskualde Garapenerako Europako Funtsaren (FEDER) laguntzarekin finantzatuta INTERREG VI-A POCTEFA 2021-2027 programaren baitan.

LANEAN Akitania‑Berria Euskadi Nafarroa Euroeskualdeak burutzen du eta mugako bi alboetako kide‑eragileek hartzen dute parte, hala nola: France Travail Nouvelle-Aquitaine, LANBIDE, Cap Emploi, Mission Locale Pays Basque, Bidasoa bizirik eta Gipuzkoako Foru Aldundia.

Helburua hiru lurraldeen artean benetako lan‑merkatua sortzea da, oraindik hainbat oztopo dauden eremu batean: oztopo linguistikoak, ezberdintasun juridikoak eta mugaz bestalde gertatzen denari buruzko informazio falta.

LANEAN hiru ardatzez dago osatuta:

1. Mugaz gaindiko lan‑merkatu partekatuaren diagnostikoa;
2. Eragile instituzionalen sare egonkor baten sorrera;
3. Amankomuneko informazio‑ eta laguntza‑zerbitzuen garapena, non Empleo Egunak ekintza adierazgarria diren.

Empleo Egunak jardunaldietako beste edizioak LANEAN proiektuaren markoan antolatuko dira, 2029ra arte inplementatuko baita.